Elizak inmatrikulatutako ondareari buruzko hitzaldia, ostegunean Legazpin

Nafarroako Ondarearen Defentsarako Plataformako kide diren Ekhiotz Prieto eta Cristina Contreras izango dira hizlariak. Burdinola elkarteak antolatu du. Goierri garaiko kasuen berri ere emango dute

Iturria: Goierriko HITZA

Lehen herriarenak, orain Vaticanorenak leloarekin, eliza katolikoak egin dituen inmatrikulazioen inguruko hitzaldia egingo du etzi osteguna Ekhiotz Prietok Cristina Contrerasekin batera Kultur Etxean, 19:00etan, Burdinola elkarteak sustatuta. Prieto eta Contreras Nafarroako Ondarearen Defentsarako Plataformako kideak dira; elizak bereganatu dituen ondasunei buruzko lana egina du plataformak.

Mendeetan zehar «herritarrena izan den ondarea eta herritarrek zaindu dutena» elizak «modu bidegabean» bereganatu duela salatzen du plataformak, Prietok azaldu duenez. Plataformako kideen jarduna Nafarroako kasuen ikerketatik hasi zen duela urte batzuk, «milatik gora daude», eta ordutik lanean dihardute informazioa zabaltzen eta ondasun horien berreskurapenean.

Espainia osoan zabaldutako auzia dela dio Prietok, «100.000 ondasunetik gora bereganatu ditu elizak, horietako asko ondare historiko izendatutakoak», eta horregatik «estatuko agenda politikoan sartu beharreko gaia da». Hori iritsi bitartean, auzitegietara jo dute hainbat tokitan.

Goierri garaiko ondasunak

Biharko hitzaldian Goierri garaian elizak inmatrikulatutako ondasunen berri ere emango dute. Lan hau, Burdinolako kide den Aitor Ibañez de Garatxanarekin batera egin dute.

Legazpiko ondasunak parrokia, San Migel baseliza eta Brinkolako eta Telleriarteko elizak dira. Lauak 1986ko irailaren 12an inmatrikulatu edo inskribatu zituzten lehen aldiz Jabetza Erregistroan, Eliza Katolikoaren izenean. Egun berean inmatrikulatu zituen baita ere Urretxuko parrokia eta San Antonio eta Santa Barbara elizak. Zumarragako parrokia eta San Kristobal eta San Gregorioko elizak, berriz, 1987ko azaroaren 30ean erregistratu zituen, eta Antioko baseliza, 1993ko ekainaren 8an. Ezkioko San Migel parrokia eta Santa Marina eta Santa Lutzi baselizak, azkenik, 1990eko ekainaren 28tik dira eliza katolikoarenak.